സെമസ്റ്റർ പരീക്ഷകൾ പലതും കഴിഞ്ഞു...
ആദ്യമായി എഴുതിയ ഒന്നാം സെമസ്റ്റർ പരീക്ഷ മുതൽ ഒടുവിൽ കഴിഞ്ഞ അഞ്ചാം സെമസ്റ്റർ പരീക്ഷ വരെ,
പക്ഷേ... അന്നൊന്നുമില്ലാത്ത തരത്തിൽ ഒരു ടെൻഷൻ...ഹൃദയമിടിപ്പൊക്കെ താളം തെറ്റിപ്പോകുന്നു....
വെപ്രാളത്തോടെ രാവിലെ തന്നെയുള്ള "കാവേരി" ബസ്സിലെ യാത്ര എനി എത്ര കാലം!
രാവിലെ വൈകി ക്ലാസിൽ കയറേണ്ടിവരുമ്പോൾ ടീച്ചറോടു പറയേണ്ട ന്യായീകരണങ്ങൾ...
ക്യാന്റീനിൽ നിന്നും പിന്നെയും വൈകി വരുമ്പോൾ അതേ ടീച്ചറോടു തന്നെ പറയാൻ കണ്ടെത്തേണ്ട പുതിയ കാരണങ്ങൾ...
ചോദ്യം ചോദിക്കുന്ന ടീച്ചറോട് അഭിമാനത്തോടെ എഴുന്നേറ്റ് നിന്ന് അറിയില്ലെന്ന് പറയുന്നത്...
ഇടയ്ക്കിടയ്ക്ക്, ഏറ്റവുമൊടുവിൽ സുരക്ഷിതമായ ബെഞ്ചിലെ, സുരക്ഷിതമായ സ്ഥലത്തിരുന്നുകൊണ്ട് പറയുന്ന,
ആർക്കും ശല്യമുണ്ടാക്കാത്ത രീതിയിലുള്ള ചില്ലറ തമാശകൾ...
അവയുണ്ടാക്കുന്ന ശബ്ദകോലാഹലങ്ങൾ !!!
അന്യോന്യം നുണ പറയാൻ വേണ്ടി മാത്രം ഒത്തുചേരുന്ന ചെറുതല്ലാത്തൊരു ലൈബ്രറി...
കടം പറയാനായി കയറി ചെല്ലുന്ന കോളേജ് കേന്റീൻ...
ഇവയൊക്കെ ഇനിയെത്ര കാലം...
ഏഴു ദിവസം മാത്രം നീണ്ടുനിന്ന മാടായി ബോയ്സ് ഹയർസെക്കന്ററിയിലെ എൻ.എസ്.എസ് ക്യാമ്പ്, ക്യാമ്പിലെ ചെറിയ ആഘോഷങ്ങൾ തന്ന വലിയ സന്തോഷങ്ങൾ...
ഐസ് ബ്രേക്കിംഗ് സെക്ഷനിലെ തമാശകൾ, ഗ്രൂപ്പ് തിരിഞ്ഞുള്ള സ്ക്വാഡ് വർക്ക്, വൈകുന്നേരങ്ങളിലെ ഒത്തുചേരൽ, ന്യൂ-ഇയർ ആഘോഷം...
നാലു ദിവസത്തെ കോളെജ് ടൂർ, പാലക്കാട്ടെ എ.ടി.എസ് റെസിഡെൻസിയിലെ താമസം,
കേശവൻ പാറ,നെല്ലിയാമ്പതി, ഹൊഗനക്കലിലെ വട്ടത്തോണിയിലെ യാത്ര...
വൈകി ക്ലാസിൽ വരാൻ വേണ്ടിയിട്ട് കണ്ടുപിടിച്ചതാണെന്നു തോന്നുന്ന പ്രൊജക്ട് ദിനങ്ങൾ…
പ്രൊജക്ട് ചെയ്യാതെ പരസ്പരം കത്തിയടിച്ച പ്രൊജക്ട് ക്ലാസുകൾ...
ഇതൊക്കെയും ഇനിയുണ്ടാകുമോ !!!
ഇന്നലെ വരെ നമുക്കെല്ലാമായിരുന്ന നമ്മുടെ കോളേജിൽ, നാളെ നമ്മൾ അന്യരായിപ്പോകും എന്നറിയുമ്പോൾ പറഞ്ഞറിയിക്കാനാവാത്ത ഒരുതരം ദു:ഖം,
സ്വന്തം വീട്ടിൽ നിന്നും പുറത്താക്കുന്നതു പോലെ...
നാമിന്നു നടന്നു തീർക്കുന്ന വഴികൾ നാളെ നമുക്ക് അന്യമായിപ്പോകുന്ന അവസ്ഥ...
ജീവിതത്തിലെ നോവേറിയ അനുഭവം...
ഇവയൊക്കെപ്പോലെ തന്നെ കൂട്ടുകാർ സമ്മാനിച്ച ഒട്ടനേകം പേരുകൾ...
കേൾക്കുമ്പോൽ ദേഷ്യം തോന്നുമായിരുന്നെങ്കിലും ഇനിയതൊക്കെ, നമുക്കന്യമാകുന്ന കോളേജിലെ കോണുകളിലെവിടെയോ തേങ്ങലുകളകളായി മാത്രം അവശേഷിക്കുമ്പോൾ...
അവയൊക്കെയും നഷ്ടമാകുമ്പോൾ, ഞാൻ തിരിച്ചറിയുന്നു കേൾക്കുമ്പോൾ ദേഷ്യം തോന്നുമായിരുന്നെങ്കിലും അതൊക്കെയും ഞാൻ സ്നേഹിച്ചവയായിരുന്നെന്ന്, കേൾക്കാനാഗ്രഹിച്ചവയായിരുന്നെന്ന്...
…..എന്ന് സ്വന്തം പടോളി
